Болалар ва ўсмирларда виртуал ўйинларга қарамлик

Ассалому алайкум, қадрли дўстлар! Бугунги кунда аддиктологларга кўп мурожаат қилинадиган муаммолардан бири — болалар ва ўсмирларда виртуал ўйинларга бўлган қарамликдир. Бу муаммо жиддий салбий оқибатларга олиб келиши мумкин.

️ Қандай аломатларга эътибор бериш керак?​

Энг муҳими, болангизнинг гаджетларда ўтказадиган вақтига эътибор қаратиш керак. Агар у интернет-ўйинларга жуда кўп вақт сарфлаётган бўлса, бу унинг ўқиши, спорт билан шуғулланиши, севимли машғулотлари ва дўстлари билан мулоқотига салбий таъсир кўрсата бошлаган бўлиши мумкин.

️ Қарамликнинг асосий белгилари​

Қарамликнинг асосий белгиларидан бири — бола ўзини мустақил равишда назорат қилолмайди ва интернетдан фойдаланишни тўхтата олмайди. Бу вазият унинг ўқишига ҳам салбий таъсир кўрсатади: дарслардаги натижалар ёмонлашади, мактабдан қолишлар кўпайиб, ўқитувчилар унинг эътиборсиз ва чарчоқ ҳолатига шикоят қилишади.

Оилавий муносабатлар ва боланинг муносабати​

Боланинг интернетга берилиши унинг ички узлатга ёпилишига сабаб бўлади. Бундай пайтларда бола билан мулоқот қилиш, унга насиҳат бериш ёки чегара қўйиш қийинлашади. Гаджетлардан фойдаланиш вақти чегараланганда, у жаҳлли ва агрессив бўлиб қолиши мумкин.

✔ Соғлиқ билан боғлиқ муаммолар​

Интернетда жуда кўп вақт ўтказувчи болаларда соғлиқ билан боғлиқ қийинчиликлар ҳам пайдо бўлади:

• уйқусизлик,
• кўриш қобилиятининг пасайиши,
• бош оғриқлари,
• кўп ўтириб қолиш туфайли семизлик.

Виртуал дунёга нега кириб кетади?​

Боланинг виртуал дунёга кириб кетиши кўпинча унинг ички эмоционал ҳолати билан боғлиқ. Бу ҳолатларга юқори даражадаги хавотир, депрессия ёки ёлғизлик ҳисси кириши мумкин. Ўсмирлик ёшда гормонал ўзгаришлар ҳам шу туйғуларни кучайтириб юборади.

Ўз-ўзига ишончсизлик ва ўйинларга берилиш​

Болаларда ўз-ўзига ишончсизлик виртуал ўйинларга бўлган қарамликни кучайтириши мумкин. У ўйинда ўзига ишонган, ақлли ва қаҳрамон сифатида ўзини тасаввур қилади, шу орқали ўз қийматини олғондай бўлади. Аммо бу ҳолат янглиш ва хомхаёлдир.

Оиладаги муаммолар ва ўйинлар​

Оиладаги танг муносабатлар, келишмовчиликлар ёки ота-она ажраши болани виртуал дунёга қочишга олиб келиши мумкин. У ўзининг ташвишли уй муҳити ўрнига фантастик ва чиройли ўйин оламида тасалли топади.

Хулоса​

Виртуал ўйинларга бўлган қарамликни ўтказиб юбормаслик учун болаларнинг ҳолатига эътиборли бўлиш, улар билан мулоқот қилиш, уларни ҳар хил қизиқарли машғулотларга жалб қилиш ва энг муҳими, оилада соғлом муҳит яратиш муҳим аҳамиятга эга.